Dənizkənarı Milli Parkda “Gimnastika hamı üçün” növü üzrə üçüncü beynəlxalq “Challenge” festivalı keçirilib. Festival iştirakçı komandaların paradı ilə start götürüb. Komandalar Bakı İdman Sarayından yürüşə başlayaraq orkestrin müşayiəti ilə Azərbaycan Dövlət Kukla Teatrının arxasında yerləşən əsas səhnəyə doğru irəliləyiblər.

      Yarışda Azərbaycan, Gürcüstan, Monqolustan və Uqanda olmaqla 4 ölkədən 900-dək iştirakçı və 52 komanda mübarizə aparıb. Azərbaycanın yarışda iştirakı yalnız paytaxtla məhdudlaşmayıb – ölkənin müxtəlif bölgələrindən gələn komandalar da fəal şəkildə təmsil olunublar.

   Festival çərçivəsində iştirakçılar iki yaş kateqoriyasında – 50 yaşdan aşağı və 50 yaşdan yuxarı – öz bacarıqlarını nümayiş etdiriblər. Tədbir zamanı müxtəlif ustad dərsləri, rəngarəng komandaların yürüşləri, gimnastika üzrə çıxışlar və hər yaşa uyğun əyləncə proqramları təşkil olunub.